Arraun Lagunak 2026ko Euskotren Ligako txapeldun Pasai Donibanen, estropada eremuko errekorrarekin

Txapeldunak Pasaiako itsasadarrean

Donostia Arraun Lagunak 2026ko Euskotren Ligako txapeldun da. Juan Mari Etxaberen traineruak abuztuaren 15ean, larunbatean, II Adinberri Bandera / XIII Pasaiako Ikurriña irabazi zuen Pasai Donibanen, 10:27,66ko denborarekin —estropada eremuko errekor berria—, eta zortzi puntu horiekin titulua bere arerioen eskumenetik kanpo utzi zuen, hiru jardunaldiren faltan.

Lugañenearen segidako laugarren Euskotren Liga da (2023, 2024, 2025 eta 2026) eta klubaren bosgarrena, 2021ekoa ere bereganatu baitzuen. Eta memoria duen agertoki batean iritsi da, gainera: Pasai Donibane, Batelera mitiko haien etxea, zeinen titulu kopurua berdindu baitute orain donostiarrek.

«Zeinek esan behar zigun Batelera mitiko horien etxean beraien titulu kopurua berdinduko genuela», laburbildu zuen Xubane Arantza Uribarrenak, Arraun Lagunakeko kapitainak.

2.778 metroko erlojupeko estropada

Jardunaldia erlojupeko formatuan arraunkatu zen, lau traineruko bi txandatan eta 17:20etatik aurrera mailakatutako irteerekin, Pasaiako badiako emakumezkoen ibilbidean: itsas milia bat eta 2/3 (2.778 metro), bi luze eta ziaboga bat. Bi txanden artean ez zen haize edo marea alde nabarmenik izan, eta, beraz, sailkapena osorik uretan erabaki zen.

Lehen txanda: Hibaika nagusi eta Zumaia atzean

Zumaia irten zen lehenengo, eta haren atzetik Donostiarra, Hibaika eta Astillero. Zumaiako traineruak jarri zuen lehen erreferentzia ziabogan (5:35), baina atzetik zetozen hirurek hobetu egin zuten: Donostiarra eta Astillero bi segundo lehenago pasa ziren (5:33) eta Hibaika, lau (5:31).

Itzulerako luzean denek ibaiaren erdialdea bilatu zuten, korrontea baliatzeko. Zumaiak izan zuen okerren eta denbora galtzen jarraitu zuen; beste hirurak oso elkarren ondoan iritsi ziren helmugara. Txandako azkarrena Hibaika izan zen, 10:42,48rekin; ondoren Astillero, segundo batera (10:43,56), Donostiarra, bira (10:44,62), eta Zumaia, hamarrera (10:52,62).

Ohorezko txanda: zazpi segundo ziabogan eta errekorra helmugan

Bigarren txandan Orio irten zen lehenik eta, ziabogan (5:30), segundo batean hobetu zuen lehen txandako erreferentziarik onena. Ondoren iritsi zen lan erdietara etxeko trainerua, San Juan (5:32), Oriok baino bi segundo gehiagorekin. Eta gero, sailkapen orokorreko lehen biak: Tolosaldeak bi segundotan hobetu zuen Hibaikaren marka (5:29) eta Lugañenek erreferentzia guztiak hautsi zituen 5:22rekin, Tolosaldeari zazpi segundo aterata.

Itzuleran, traineruak berriro ibaiaren erdialdean, Oriok hirugarren amaitu zuen, Hibaikaren kronoari ehunen batzuk kenduta (10:42,00). San Juanek bi segundo eskas gehiago behar izan zituen (10:43,88), baina Astillero tartean sartuta, etxeko trainerua seigarren geratu zen.

Helmuga zeharkatzen azkenak izan ziren biek denbora guztiak hobetuta zituzten ordurako. Tolosaldea iritsi zen lehena, 10:36,46rekin, eta Arraun Lagunakek berak iaztik Pasaiako uretan zuen errekorra hobetu zuen. Poza ez zitzaion luze iraun: minutu gutxira, Lugañenek 10:27,66an gelditu zuen kronoa, Tolosaldearen markatik 8,80 segundo behera, eta estropada eremuko errekor berria utzi zuen.

Emaitza

🥇 Arraun Lagunak — 10:27.66
🥈 Tolosaldea — 8,80 s-ra
🥉 Orio — 14,34 s-ra

Estropadaren sailkapen ofiziala

104 puntu 104tik: liga, erabakita

Hamahiru estropada jokatuta, hamahiru bandera eta 104 puntu 104 posibletik. Hiru jardunaldi falta direla —gainerakoentzat 72 puntu jokoan oraindik, baina traineru bakoitzak 24 baino ezin ditu eskuratu—, Tolosaldeak ezin du 104tik gora egin; beraz, titulua matematikoki Arraun Lagunakena da.

Atzetik, San Juanek hirugarren postua berreskuratu du eta Orio laugarren da, Astillero bi puntura duela. Beheko aldean, Donostiarrak Pasaian Zumaiari atera dion puntuak zazpira zabaltzen du bere aldea azken postua ekiditeko borrokan.

Euskotren Ligako sailkapena hamalau jardunaldiren ondoren

Pasai Donibane egutegiko hamalaugarren jardunaldia zen, baina jokatutako hamahirugarrena: J8a, Donostiako Fabrika Bandera, bertan behera geratu zen eta ez zuen punturik banatu.

Hurrengo hitzordua abuztuaren 16an, igandean, Getarian da, III. Getariako Ikurriñarekin. Jardunaldi honetatik aurrera, igandeetako txandak sailkapen orokorraren arabera osatuko dira: Arraun Lagunak ohorezko txandan arraunkatuko du, Tolosaldea, San Juan eta Oriorekin batera.

Arraun Lagunaken tripulazioa

Arraun Lagunaken deialdia Pasai Donibanen, Juan Mari Etxabe entrenatzaile, Itziar Eguren ordezkari eta Xubane Arantza Uribarrena kapitain zirela. Tripulazioa osatu zuten: Nerea Aguirrezabal, Jule Arkotxa, Aiora Belartieta, Maider Bereau, Amaia Eguren, Zuberoa Egurrola, Maren Etxabe, Lorea Etxabe, Naroa Landa, Marcia Rosalia Larrea, Naiara Martin, Ania Perez, Ane Sanchez eta Xubane Arantza Uribarrena.

Ordezkoak: Itxaso Alonso, Maddi Azpiroz, Lucia Canal, Daria Perez, Beatriz Piñeiro eta Eider Uribarrena arraunlari gisa, eta Nagore Osoro patroi gisa.